Жаңалықтар

"Адал азамат, зерделі ұлт және жауапты қоғам қалыптастырудың негізі "

1 қыркүйек- Білім күні құтты болсын!

Жамбыл атындағы мектеп-лицейінде 2026-2027 оқу жылында Білім күніне арналған «Қазақстан Республикасының Конституциясы: Адал азамат, зерделі ұлт және жауапты қоғам қалыптастырудың негізі» атты салтанатты жиыны өткізілді. Салтанатты жиынға қонақтар, ата-аналар, мектеп мұғалімдері мен оқушылар қатысты.

Шуақты қыркүйек айының алғашқы күні барша оқушыларды алтын ұя мектебіне қайта оралып, мектеп табалдырығын алғаш аттаған бүлдіршіндермен бірге сыңғырлаған қоңырау үнімен табысты. Мектеп-лицей директоры Қылышбаева Қадиша Әуесқызы ата-аналар мен жас бүлдіршіндерді мерекемен құттықтап, жылы лебізін білдіріп, жаңа оқу жылына сәтті қадам тіледі.Сондай-ақ ардагер ұстаз Айдаршаева Роза апай құттықтау сөз сөйлеп, білім мен тәрбиенің қоғамдағы маңызын атап өтті. Ол балаларға жарқын болашақ пен жоғары жетістіктер тіледі.

Мерекелік жиын барысында ата-аналар атынан Қоғамдық кеңес төрағасы Нысанбеков Білім ағай сөз алып, жүрекжарды тілегін арнап, ұстаздарға ризашылығын білдірді.Аудандық білім бөлімінің әдіскері Жақыпбекова Злиха Әсенқызы жас бүлдіршіндерге сәтті қадам тілеп,білімді ұстаздарымызды аудандық,облыстық,республикалық Алғыс хаттармен марапаттады.

Көптен күткен алғашқы қоңырау үні 1-сынып бүлдіршіндері үшін ерекше әсерлі сәтке айналды.

Жамбыл атындағы мектеп-лицейі – білімнің шамшырағы, мейірім мен парасаттылықтың ордасы.

Жаңа оқу жылы табысты, жемісті болсын!

БІЛІМ КҮНІ ҚҰТТЫ БОЛСЫН!

Құрметті ұстаздар, ардақты ата-аналар, қымбатты оқушылар!

Баршаңызды жаңа оқу жылының басталуымен, 1 қыркүйек – Білім күнімен шын жүректен құттықтаймын!

Әр жыл сайын 1 қыркүйек – мектеп табалдырығын аттаған мыңдаған баланың жүрегіне жаңа арман ұялайтын, ұстаздардың жаңа мақсатқа қадам басатын ерекше күн.

Бұл – күнтізбедегі қарапайым дата емес.

Бұл – білімге бастар жолдың, үлкен арманның, жаңа мүмкіндіктердің бастауы.

Ұстаз үшін – жаңа шәкірт, жаңа үміт, жаңа ізденіс.

Оқушы үшін – жаңа білім, жаңа достар, жаңа белестер.

Ата-ана үшін – баласының болашағына жасалған тағы бір маңызды қадам.

Құрметті ұстаздар!

Сіздердің қолдарыңызда – елдің ертеңі.

Сіздер тек білім беріп қана қоймайсыздар. Сіздер баланың бойына сенім ұялатасыздар, жақсы мен жаманды ажыратуға үйретесіздер, арманына қанат бітіресіздер.

Ұстаз еңбегінің нәтижесі – бүгінгі бағада ғана емес, ертеңгі азаматтың елге жасаған қызметінде.

Сондықтан ұрпақ тәрбиесі жолындағы еңбектеріңізге шынайы ризашылығымды білдіремін. Әр шәкіртіңіздің жетістігі сіздерге үлкен мақтаныш болсын!

Қымбатты оқушылар!

Білім – ешкім тартып ала алмайтын ең үлкен байлық.

Сондықтан әр күніңізді жаңа нәрсе үйренуге арнаңыздар. Қателесуден қорықпаңыздар, өйткені әр қателік – тәжірибе, әр талпыныс – жетістікке бастар қадам.

Армандаңыздар. Ізденіңіздер. Еңбек етіңіздер. Өздеріңізге сеніңіздер!

Себебі бүгінгі мектеп оқушысы – ертеңгі ғалым, дәрігер, ұстаз, инженер, кәсіпкер, ел басқарған азамат.

Құрметті ата-аналар!

Баланың жетістігі – мектеп пен отбасының ортақ еңбегінің жемісі. Балаға берілген ең үлкен қолдау – оның әр қадамына сену, әр талпынысын бағалау.

Ұрпағымыздың сапалы білім алып, саналы азамат болып қалыптасуы жолында мектеппен бірге ынтымақтаса еңбек ете берейік.

Жаңа оқу жылы баршамызға жаңа бастамалар, биік мақсаттар, толағай жетістіктер әкелсін!

Мектептерімізде білім мен тәрбие қатар өріліп, әр баланың арманына жол ашылсын!

Ұстаздарымыздың мерейі үстем, шәкірттеріміздің білімі терең, ата-аналарымыздың қуанышы мол болсын!

Білімді ұрпақ – қуатты мемлекеттің тірегі.

Ал сол ұрпақтың жарқын болашағы – бәріміздің ортақ жауапкершілігіміз.

1 қыркүйек – Білім күні құтты болсын!

Жаңа оқу жылына ақ жол!

Ізгі ниетпен,

Жамбыл атындағы мектеп-лицейінің директоры Қадиша Әуесқызы

ҚҰРМЕТТІ ПЕДАГОГТЕР!

Жаңа оқу жылының басталуына орай 1 қыркүйек – Білім күнін ұйымдастыру және өткізу бойынша ұсынымдар жарияланды.

Құжаттарда Білім күнін өткізу тәртібі, бірыңғай сынып сағатын ұйымдастыру, сондай-ақ жаңа оқу жылына дайындыққа қатысты негізгі ұсынымдар қамтылған.

Толық ақпаратпен танысу үшін келесі сілтемеге өтіңіз:

Отырар ауданы білім бөліміне қарасты «Жамбыл атындағы мектеп-лицей» КММ-нің 2026–2027 оқу жылына арналған жұмыс жоспарына сәйкес,мектеп-психологтары 1-11 сынып оқушыларының ата-аналарына WhatsApp әлеуметтік желісіндегі ата-аналар тобы арқылы

«Эмоцияларды басқару: күйзеліс пен мазасыздықты жеңілдетудің қарапайым тәсілдері»тақырыбында онлайн түсіндіру жұмысы жүргізілді.

Мақсаты:

Ата-аналардың балалардың психологиялық саулығына жауапкершілігін арттыру, күйзеліс пен мазасыздық белгілерін дер кезінде байқауға бағыт-бағдар беру, баламен тиімді қарым-қатынас орнатудың маңыздылығын түсіндіру және эмоционалдық қолдау көрсету жолдарымен таныстыру.

Түсіндіру барысында ата-аналарға баламен ашық сөйлесудің маңыздылығы, күн тәртібі мен ұйқы режимін сақтау, әлеуметтік желілерді тиімді пайдалану, спортпен және шығармашылықпен айналысуға ынталандыру, сондай-ақ қажет болған жағдайда мектеп психологының көмегіне жүгіну жөнінде ұсыныстар берілді.

Қорытынды:

Онлайн түсіндіру жұмысы өз мақсатына жетті. Ата-аналарға тақырып бойынша қажетті ақпарат беріліп, балалардың психологиялық денсаулығын сақтау мен нығайтудағы отбасының рөлі түсіндірілді. Сонымен қатар, тақырыпқа сәйкес дайындалған жадынама ата-аналар чатына жіберіліп, танысуға ұсынылды

Оқушы сөмкесінің салмағы қанша болуы керек? Министрлік түсіндірді

Жаңа оқу жылы қарсаңында Денсаулық сақтау министрлігі ата-аналарға мектеп сөмкесін таңдауда маңызды талаптарды еске салды.

Негізгі ереже - оқулықтар мен оқу құралдары салынғансөмкенің жалпы салмағы баланың дене салмағының 10%-ынан аспауы керек. Мысалы, салмағы 30 кг оқушының рюкзагы 3 кг-нан ауыр болмағаны жөн.

Мектеп сөмкесінің салмағы:

1–3 сынып – 2 кг дейін;

4–5 сынып – 2,5 кг дейін;

6–7 сынып – 3,5 кг дейін;

8–11 сынып – 4,5 кг дейін.

Сөмке таңдағанда неге мән беру керек?

Мамандар мектеп сөмкесін баламен бірге таңдауға кеңес береді. Сатып алмас бұрын оны баланың арқасына салып көріп, бойына сай әрі ыңғайлы екеніне көз жеткізген жөн.

Жарық шағылыстыратын элементтері болғаны маңызды. Сондай-ақ берік әрі су өткізбейтін материалдан жасалғаны жөн

Мемлекет басшысы Қасым-Жомарт Тоқаев қазақстандықтарды Абай күнімен құттықтады

Мемлекет басшысы Ұлы ойшылдың шығармашылық әрі зияткерлік мұрасы әлемдік және ұлттық мәдениеттің асыл қазынасы қатарынан айрықша орын алатынын атап өтті.

«Абай ілімі – рухани шамшырағымыз, айнымас темірқазығымыз. Ақын жұртшылықты толғандыратын көкейкесті мәселелерді бүкпесіз айтып, халқымызды бейқамдық пен жалқаулықтан аулақ болуға шақырды. Хакімнің «Толық адам» идеясы – әрбір азаматты рухани кемелденуге үндейтін және ешқашан өзектілігін жоғалтпайтын мазмұны терең тұжырым»,-делінген құттықтауда.

Президент Қасым-Жомарт Тоқаев Ұлы ойшылдың мол мұрасы алдағы уақытта да өскелең ұрпақты шынайы отаншылдық пен туған елге сүйіспеншілік рухында тәрбиелеу ісінде рухани азық болатынына сенім білдірді

Құрметті ата-аналар!Біздің балғын-бүлдіршін жас шәкірттеріміз!

Қадірменді әріптестер!

Бүгін 10 тамыз əлемдік деңгейдегі ойшыл, ұлт руханиятының темірқазығы – Абай Құнанбайұлының туған күні.

Халқымыз осы қуанышты күнді үлкен құрметпен қарсы алғалы тұр. Осылайша Хакім Абайға, ұлт мәдениетіне құрмет көрсетуді жалғастыра береміз!

Қазақстан Республикасының Президенті Қасым-Жомарт Тоқаев өзінің «Абай және ХХІ ғасырдағы Қазақстан» атты концептуалды мақаласында: «Ғұлама Абай – қазақ топырағынан шыққан әлемдік деңгейдегі кемеңгер. Ол күллі адамзат баласына ақыл-ойдың жемісін сыйлады»,-деп дара перзенттің даналық орнын айқындап көрсеткен еді.

Расында ұлы ақын өз шығармаларында насихаттаған еңбексүйгіштік, білімге деген құштарлық, ізгілік пен парасатқа зейін қойып, тәрбие алу – бүгінгі ұрпақтарының алдында тұрған міндеттің бірі. Хакім Абай айтқан ізгі құндылықтар өміршеңдігін жоймақ емес.

Үкімет қаулысымен 10 тамыз – Абай күні болып жарияланып, мемлекеттік мерекелер күнтізбесіне енгізілді. Бұл – үлкен қуаныш! Бәріңізді шын жүректен құттықтаймын!

Бұл – сіз бен біздің ортақ жетістігіміз. Бұл күні еліміздің орталықтарында,білім беру ордалары мен əр аймағында бүгінгі күннің талабына сай, негізінен online,оффлайн форматта мәдени іс-шаралар өтеді.

Бұл күні өңірлерде той тойлайтын емес, ой толғайтын бірқатар мазмұнды іс-шара жоспарланған. Бұл ретте "Абай -дана,Абай-дара"атты көркемсөз оқу сайыстары, «Абай мұрасы» атты онлайн-музейлік дəріс, «Абай – халықтың даналығы» виртуалды көрмесі, «Абай əлемі» онлайн-концерті, ұлы ақын мерейтойына орай бейне-дəріс өтеді.Жамбыл атындағы мектеп-лицейінде осыған дейін біршама іс-шара ұйымдастырылғандай алдағы уақытта да көптеген әдеби-мәдени іс-шаралар жалғасын таба береді.

«Адал азамат», «Заң мен тәртіп» қағидаттарын ұстана отырып, біз кемел елдің болашағын қалыптастырамыз. Ұстаздарымыз бен шәкірттеріміз Абай армандаған «толық адам» сипатына сай болып, еліміздің өсіп-өркендеуіне өз үлесін қосады деп сенемін.

Баршаңызға мықты денсаулық, шығармашылық табыс, оқу мен ғылым жолында жаңа биіктер тілеймін!

Абай күні құтты болсын!

Жамбыл атындағы мектеп-лицей директоры-

Қылышбаева Қадиша Әуесқызы

Қысқы демалыс 14 күн: 2026–2027 оқу жылына арналған каникул кестесі бекітілді

Оқу-ағарту министрлігі 2026-2027 оқу жылындағы оқу мерзімдері мен демалыс кезеңдерін бекітті. Министрлік мәліметінше, жаңа оқу жылы 1 қыркүйекте басталып, 2027 жылы 25 мамырда аяқталады.

I тоқсан 8 оқу аптасына созылады. Күзгі демалыс 7 күнге жалғасып, 26 қазан мен 1 қараша аралығында өтеді.

II тоқсан да 8 оқу аптасын құрайды. Қысқы демалыс 14 күнге созылады - 28 желтоқсан мен 10 қаңтар аралығында.

1-сынып оқушылары үшін 8-14 ақпан аралығында 7 күндік қосымша демалыс қарастырылған.

III тоқсан 10 оқу аптасына созылады. Көктемгі демалыс 7 күнге жалғасады, 22-28 наурыз аралығында.

IV тоқсан 8 оқу аптасына созылып, 25 мамырда аяқталады

«САЛАМАТТЫ МЕКТЕП» ЖОБАСЫ- БАЛАЛАР ДЕНСАУЛЫҒЫНА БАСТЫ НАЗАР!!

Түркістан облысы Отырар ауданы білім бөліміне қарасты "Жамбыл атындағы мектеп-лицей” коммуналдық мемлекеттік мекемесінде 2026-2028 жылдарға арналған “ Саламатты мектеп” жобасы аясында оқушылардың денсаулығын нығайтуға, қауіпсіз әрі қолайлы білім беру ортасын қалыптастыруға бағытталған жұмыстар жүйелі түрде жүзеге асырылады.

Жобаның басты мақсаты – оқушылардың физикалық, психологиялық және әлеуметтік денсаулығын қолдау, салауатты өмір салтын қалыптастыру және денсаулық мәдениетін дамыту.

Жобаның негізгі бағыттары:

Дене белсенділігі және салауатты өмір салты;

Дұрыс тамақтану;

Психологиялық қолдау және эмоционалдық тұрақтылық;

Қауіпсіз әрі қамқор мектеп ортасы;

Білім мен тұлғалық даму;

Ата-ана, ұстаз және оқушы ынтымақтастығы;

Қоршаған ортаға жауапкершілік.

Саламатты бала – саламатты ұрпақ – саламатты ел болашағы!

Біз бірге денсаулықты бағалайтын, қауіпсіздікті сақтайтын, бір-біріне қамқор болатын және белсенді өмір салтын ұстанатын мектеп-лицей ортасын қалыптастырамыз!

Біз біргеміз!

Біз саламатты өмірді таңдаймыз!

1 СЫНЫПҚА ҚАБЫЛДАУ ЖҮРІП ЖАТЫР

ҚАЖЕТТІ ҚҰЖАТТАР ТІЗІМІ

• Ата-ананың немесе заңды өкілінің өтініші

• Nº065-2/у нысанындағы денсаулық, жағдайы туралы анықтама

және Nº052-2/у нысанындағы баланың денсаулык паспорты.

• Өлшемі 3*4 см сурет (2 дана)

Құрметті ата-аналар!

Құжаттарды тапсыруды соңғы күндерге қалдырмай,

балаңызды мектепке беруді алдын ала ойластыруға шакырамыз!

ҚАБЫЛДАУ УАҚЫТЫ: 29 МАУСЫМ - 31 ТАМЫЗ

Өтініш демалыс жане мереке күндерді қоспағанда,

дүйсенбі-жұма аралығында қабылданады.

Біз сіздерді күтеміз!