ӨНЕР ФЕСТИВАЛІ ӨТТІ
Түркістан облысы, Отырар ауданы білім бөлімінің ұйымдастыруымен 2025 жылғы 8 сәуір күні «Біздің бірлігіміз-болашақтың білімінде» айдарымен аудандық Мәдениет үйінде Облыстық білім басқармасының 19.11.2024 жылғы №395 бұйрығына сәйкес, аудандағы жалпы білім беретін мектептерден дарынды, өнерлі, талантты оқушылар қатысып, өз өнерлерін көрсетті.
Сонымен қатар аудандағы барлық мектептің еңбек пәнінің мұғалімдері ұлттық қолөнер бұйымдарының көрмесін ұйымдастырды.
Фестивальге облыстық қосымша білім беруді дамыту орталығының қызметкерлері Айтов Мырзарайым Әбдікерімұлы, Кошенов Алмат Нұртасұлы және М.Әуезов атындағы Оңтүстік Қазақстан университетінің аға оқытушысы Ағабекова Салтанат Сәбитқызы және аудандық білім бөлімінің әдіскерлері Рысбай Серғазы Тыныштықұлы мен Арын Ахмет Әлиұлы келіп,қазылық етті.
Фестивальдің негізгі мақсаты — ауданымыздағы дарынды балалар мен жасөспірімдердің өнерін дәріптеу, олардың сахналық мәдениетін дамыту, сондай-ақ, ұлттық құндылықтар мен патриоттық рухты насихаттау болды. Бұл жолы да фестиваль өз деңгейінде өтіп, көрермендерге ерекше әсер сыйлады.Фестиваль барысында ұйымдастырушылар тарапынан қатысушыларға алғыс хаттар мен марапаттар табыс етілді. Әділ қазы алқасы өнерпаздардың жетістіктеріне ерекше тоқталып, алдағы уақытта да осындай мәдени іс-шаралар дәстүрлі түрде жалғасын табатынын айтты.Жамбыл атындағы мектеп-лицейі ұжымы өнер фестивалінің қорытындысы бойынша жүлделі 1 орынды иемденді.
— Бұл фестиваль балалар мен жасөспірімдердің бойындағы талантты ашуға үлкен мүмкіндік береді. Біз олардың шығармашылығына қолдау көрсетіп, рухани өсуіне жағдай жасауға әрдайым дайынбыз, — деді облыстық қосымша білім бөлімінің саз жетекшісі Мырзарайым Әбдікерімұлы өз сөзінде.
Осылайша, аудандық өнер фестивалі бір сәтке болса да көпшілікті әсем өнер әлеміне жетелеп, қатысушылар мен көрермендердің есінде ұзақ сақталатын әсерлі кешке айналды. Ел болашағы — өнерлі өрендердің осындай сахналарда шыңдалып, биік белестерге ұмтылуы — біз үшін үлкен мақтаныш.
#Түркістан_облысы_білім_басқармасы
